ಮಂಗಳೂರಿನ ಸ್ಮಾರ್ಟ್ ಸಿಟಿಯ ನಾನಾ ಯೋಜನೆಗಳಲ್ಲಿ ಒಂದು ಎಂದು ಪರಿಗಣಿಸಲ್ಪಟ್ಟ ಕುಡ್ಲ ಸಿಟಿಯ ಕ್ಲಾಕ್ ಟವರ್‌ನಲ್ಲಿ ಇನ್ನು ಕೆಲವೇ ದಿನಗಳಲ್ಲಿ ಟಿಕ್ ಟಿಕ್ ಸದ್ದು ಕೇಳಿಸಲಿದೆ. ಇದಕ್ಕೆ ಇಟಲಿ ಮೂಲದ ಯಂತ್ರಗಳನ್ನು ಆಳವಡಿಸಲಾಗಿದೆ ಎನ್ನುವುದು ವಿಶೇಷ.
ಮಂಗಳೂರಿನ ಮಾರ್ನಮಿಕಟ್ಟೆಯ ನಾಯಕ್ಸ್ ಟೈಮ್ ಸಂಸ್ಥೆಯ ಸತೀಶ್ ಚಂದ್ರ ನಾಯಕ್ ಹಾಗೂ ಅವರ ಪುತ್ರ ಸಿದ್ದಾಂತ್ ನಾಯಕ್ ಅವರು ಈ ಕ್ಲಾಕ್ ಟವರ್‌ಗೆ ಅಳವಡಿಸಲಾಗುವ ಕ್ಲಾಕ್‌ನ ಹಿಂದಿನ ಶಕ್ತಿಗಳು. ಮಂಗಳೂರು ಈಗಾಗಲೇ ಸ್ಮಾರ್ಟ್ ಸಿಟಿಯ 100 ನಗರಗಳಲ್ಲಿ ಒಂದು ಎಂದು ಪರಿಗಣಿಸಲ್ಪಟ್ಟಿದೆ. ಇದರ ಅಂಗವಾಗಿ ಮೊದಲ ಕ್ಲಾಕ್ ಟವರ್ ಯೋಜನೆ ಪೂರ್ಣವಾಗಿರುವುದು ಕುಡ್ಲದ ಜನಕ್ಕೆ ಖುಷಿ ನೀಡಲಿದೆ.
88 ಅಡಿ ಸುತ್ತಳತೆ ಹೊಂದಿರುವ ಈ ಕ್ಲಾಕ್‌ನಲ್ಲಿ ಬಳಕೆಯಾಗುವ ಯಂತ್ರೋಪಕರಣಗಳು ಎಲ್ಲವೂ ಇಟಲಿ ದೇಶದಿಂದ ಆಮದು ಮಾಡಿಕೊಳ್ಳಲಾಗಿದೆ. ವಿಶೇಷವಾಗಿ 8 ನಾನಾ ಬಗೆಯ ಬೆಲ್ ಮಾಡುವ ಸಾಮರ್ಥ್ಯ ಇರುವ ಮೈಕ್ರೋ ಪ್ರೊಸೆಸರ್ ಕೂಡ ಇದ್ದರೂ ಭಾರತೀಯ ಜನತೆಗೆ ಇಷ್ಟವಾಗುವಂತಹ ಒಂದೇ ವಿಧದ ಬೆಲ್ ಮಾಡುವ ವ್ಯವಸ್ಥೆಯನ್ನು ಮಾಡಲಾಗಿದೆ. ಈ ಕ್ಲಾಕ್‌ಗೆ ಅಕ್ರೇಲಿಕ್ ಶೀಟ್, ಸ್ಟೈನ್‌ಲೆಸ್ ಸ್ಟೀಲ್ ಹಾಗೂ ಎಸಿಪಿ ಶೀಟ್‌ಗಳನ್ನು ಬಳಸಿಕೊಂಡು ಸಿದ್ಧಪಡಿಸಿಕೊಂಡಿದ್ದು, ಈಗಾಗಲೇ ಗೋಪುರದ ನಾಲ್ಕು ಮೂಲೆಗಳಲ್ಲಿ ನಾಲ್ಕು ಕ್ಲಾಕ್‌ನ ಮಾದರಿಗಳಿಗೆ ನಾಲ್ಕು ಯಂತ್ರಗಳನ್ನು ಆಳವಡಿಸುವ ಕೆಲಸ ಮುಂದಿನ ವಾರದಿಂದ ಸಾಗಲಿದೆ.
ನಾಯಕ್ಸ್ ಟೈಮ್ಸ್‌ನ ಮಾಲೀಕ ಸತೀಶ್ ಚಂದ್ರ ನಾಯಕ್ ಹೇಳುವಂತೆ ಇದೊಂದು ವಿಶಿಷ್ಟವಾದ ಗಡಿಯಾರ. ಕಳೆದ ಮೂರು ತಿಂಗಳುಗಳಿಂದ ಇದರ ಕೆಲಸಗಳು ಆರಂಭವಾಗಿದ್ದು, ಮುಖ್ಯವಾದ ಕೆಲಸಗಳೆಲ್ಲವೂ ಪೂರ್ಣಗೊಂಡಿದ್ದು, ಮುಂದಿನ ಒಂದು ವಾರದಲ್ಲಿ ಕುಡ್ಲದ ಜನರಿಗೆ ಸಮಯ ನೋಡುವ ಅವಕಾಶ ಸಿಗಲಿದೆ. ಇಟಲಿಯಿಂದ ಮೈಕ್ರೋ ಪ್ರೋಸೆಸರ್‌ವನ್ನು ತಂದಿರುವುದರಿಂದ ಸಮಯದ ಸದ್ದು ಕೂಡ ವಿಶಿಷ್ಟವಾಗಿ ಕೇಳಿಸಲಿದೆ. ಪ್ರತಿ ಗಂಟೆಯ ಪ್ರಕಾರ ಬೆಲ್ ಹಾಗೂ ಅರ್ಧ ಗಂಟೆಗೆ ಸಿಂಗಲ್ ಬೆಲ್ ಕೇಳಿಸಲಿದೆ. 75 ಅಡಿ ಎತ್ತರ 14 ಅಡಿ ಅಗಲದಲ್ಲಿ ಈ ಗಡಿಯಾರ ಕೂರಲಿದೆ. ಈ ಹಿಂದೆ 45 ಅಡಿ ಎತ್ತರದಲ್ಲಿ ಈ ಗಡಿಯಾರ ಕಾಣಿಸಿಕೊಂಡಿತ್ತು. ಹೊಸ ಗಡಿಯಾರಕ್ಕೆ ವಿದ್ಯುತ್ ಬೇಕಾಗುತ್ತದೆ. ಮೂರು ಬ್ಯಾಟರಿಗಳನ್ನು ಇಡಲಾಗುತ್ತದೆ. 400 ವ್ಯಾಟ್ ಸಾಮರ್ಥ್ಯ ಇರುವ ಎಲ್‌ಇಡಿ ಬಲ್ಬ್‌ಗಳನ್ನು ಗಡಿಯಾರದ ಒಳಭಾಗದಲ್ಲಿ ಅಳವಡಿಸುವ ಕೆಲಸ ಸಾಗಲಿದೆ .
