ಒಂದು ರೂಪಾಯಿಯಲ್ಲಿ ಬೆಂಡೆ, ಬದನೆ, ಅಲಸಂಡೆ ಹೀಗೆ ಯಾವುದೇ ತರಕಾರಿಯನ್ನು ಕೂಡ ಬೆಳೆಸಬಹುದು. ಅಂದಹಾಗೆ ಈ ಗಿಡಗಳನ್ನು ಬೆಳೆಸುವ ಮಂದಿ ರೈತರು ಅಲ್ಲ ಸರಕಾರಿ ಕಚೇರಿಯಲ್ಲಿ ಕೂರುವ ಅಧಿಕಾರಿಗಳೇ ಗಿಡಗಳನ್ನು ಬೆಳೆಸಿಕೊಂಡು ರೈತರಿಗೆ ನೀಡುವ ಕೆಲಸ ಮಾಡುತ್ತಿದ್ದಾರೆ.
ಹೌದು. ಬೆಳ್ತಂಗಡಿಯ ಮದ್ದಡ್ಕ ತೋಟಗಾರಿಕೆ ಇಲಾಖೆಯ ಸಹಾಯಕ ನಿರ್ದೇಶಕರಾದ ಲಿಖಿತಾ ಸೇರಿದಂತೆ ಅವರ ಅಧೀನದಲ್ಲಿ ಕಾರ್ಯ ನಿರ್ವಹಣೆ ಮಾಡುವ ಇಬ್ಬರು ತೋಟಗಾರರು ಸೇರಿಕೊಂಡು ತಟ್ಟೆ(ಟ್ರೈ)ಯಲ್ಲಿ 14 ಬಗೆಯ ತರಕಾರಿ ಸಸಿಗಳನ್ನು ಬೆಳೆಸಿದ ಬಳಿಕ ಅದನ್ನು ರೈತರಿಗೆ ನೀಡುವ ಕೆಲಸ ಮಾಡುತ್ತಾರೆ. ಒಂದು ಗಿಡಕ್ಕೆ 1 ರೂ.ನಂತೆ ಮಾರಾಟ ಮಾಡಲಾಗುತ್ತದೆ. ಅದರಲ್ಲಿ 87 ಪೈಸೆ ಸಸಿಗೆ ಖರ್ಚಾದರೆ ಉಳಿದ ಮೊತ್ತ ಇಲಾಖೆಗೆ ಲಾಭವಾಗಿ ಬದಲಾಗುತ್ತದೆ.
ಮುಖ್ಯವಾಗಿ ಒಂದು ತಟ್ಟೆ(ಟ್ರೈ)ಯಲ್ಲಿ 98 ಸಸಿಗಳನ್ನು ನೆಡಲಾಗುತ್ತದೆ. ಎರೆಹುಳ ಗೊಬ್ಬರ, ಕೋಳಿ ಗೊಬ್ಬರ ಬಳಸಿಕೊಂಡು ಈ ಸಸಿಯನ್ನು ಬೆಳೆಸಲಾಗುತ್ತದೆ . ಕಳೆದ ವರ್ಷ ಒಂದೆರಡು ತರಕಾರಿ ಸಸಿಗಳಲ್ಲಿ ಈ ಪ್ರಯೋಗ ಮಾಡಲಾಗಿತ್ತು ಈ ಬಾರಿ 14 ನಾನಾ ಬಗೆಯ ತರಕಾರಿ ಸಸಿಗಳನ್ನು ಬೆಳೆಸಿಕೊಂಡು ಮಾರಾಟ ಮಾಡಲಾಗುತ್ತಿದೆ ಎನ್ನುತ್ತಾರೆ ಲಿಖಿತಾ ಅವರು.
